काठमाडौं । सत्तारुढ नेकपाको सचिवालय बैठक जारी छ । केहीबेर अघि बालुवाटारमा बसेको बैठकमा प्रधानमन्त्री एवं पार्टी अध्यक्ष केपी ओलीले लिखित जवाफ प्रस्तुत गर्दैछन् । बैठकमा उनले यसअघि अर्का अध्यक्ष पुष्पकमल दाहालले पेश गरेको प्रतिवेदनको जवाफ लिखित रुपमा प्रस्तुत गर्न लागेका हुन् । ओलीले आफूमाथि लागेका आरोपवारे बैठकमा प्रस्ष्ट पार्ने उनी निकट नेताहरुले बताएका छन् ।
यसअघि गत मङ्सिर तीन गतेको सचिवालय बैठकले अध्यक्ष ओलीले माग गरेअनुसार लिखित जवाफ दिन उनलाई दश दिनको समय दिएको थियो । सो बैठकमा प्रधानमन्त्री ओलीले आफूमाथि लगाइएका अभियोगको उचित जवाफ दिने जनाएका थिए । प्रधानमन्त्री ओलीको प्रतिवेदनपछि पार्टी विवाद थप चुलिने आँकलन गरिएको छ । नेकपा विवादमा मङ्सिर १८ गते हुने स्थायी कमिटीको बैठक र मङ्सिर २५ गते हुने केन्द्रीय समितिको बैठकमा पनि छलफल हुनेछ ।
दाहालले ओलीलाई पार्टी पद्धती र बिधान अनुरुप नचलाएको आरोप लगाएका छन् । पार्टीभित्र विवाद बढ्दै जाँदा नेकपाका अध्यक्ष ओली र दाहाल एक अर्का बिरुद्ध आरोप प्रत्यारोपमा उत्रिएका छन् । राजदूत नियुक्ति, मन्त्रीपरिषदमा हेरफेर, कर्णाली विवाद, भारतीय जासुसी संस्थाका प्रमुखको नेपाल भ्रमणलगायत विषयलाई लिएर नेकपामा विवाद छ ।
