काठमाडौं । बालुवाटारमा प्रधानमन्त्री एवं पार्टी अध्यक्ष केपी शर्मा ओलीको छलफलमा कुनै सहमति हुन नसकेपछि बालुवाटारबाट निस्किएका वरिष्ठ नेता माधव नेपाल पार्टी कार्यालय धुम्बाराही पुगेका छन् ।
ओली, नेपाल र अर्का अध्यक्ष पुष्पकमल दाहाल प्रचण्डबीच बालुवाटारमा बिहीबार भएको छलफल विना निष्कर्ष टुंगिएको थियो । धुम्बाराही पार्टी कार्यालयमा नेपालले सचिवालय सदस्य एवं उपप्रधानमन्त्री ईश्वर पोखरेलसँग छलफल गरेका छन् । छलफलमा नेपाल र पोखरेल भोलि बोलाईएको स्थायी कमिटी बैठक नरोक्नेमा सहमत भएका छन् । शीर्ष नेताबाट कुनै सहमति नजुटेपछि स्थायी कमिटी बैठकमार्फत नै पार्टीभित्रको विवाद हल गर्ने पहल गर्ने नेपाल र पोखरेलबीच समझदारी बनेको बताइन्छ ।
प्रधानमन्त्रीले राजिनामा दिनुपर्ने अडान प्रचण्ड र नेपालले राखेपछि बालुवाटारमा भएको छलफल विना निष्कर्ष टुंगिएको थियो ।
ओलीले दुबै पदबाट राजिनामा नदिने जवाफ दिएका थिए । स्थायी समिति बैठकमा प्रधानमन्त्रीले राजिनामा दिनुपर्ने माग उठेपछि विवाद समाधान गर्न दुई अध्यक्षबीच पटक पटक भएको छलफल र आज त्रिपक्षिय छलफल भएको हो ।
