कमिल मिशाराको शतक र बलरको उत्कृष्ट प्रदर्शनमा काठमान्डुलाई हराउँदै चितवन दोस्रो क्वालिफायरमा

कमिल मिशाराको शतक र बलरको उत्कृष्ट प्रदर्शनमा काठमान्डुलाई हराउँदै चितवन दोस्रो क्वालिफायरमा

काठमाडौं । ओपनर कमिल मिशाराको शानदार शतक र बलरहरूको उत्कृष्ट प्रदर्शनमा काठमान्डु गोर्खाजलाई पराजित गर्दै चितवन राइनोज नेपाल प्रिमियर लिग (एनपीएल) को दोस्रो क्वालिफायरमा प्रवेश गरेको छ। कीर्तिपुरस्थित त्रिवि क्रिकेट मैदानमा भएको एलिमिनेटर खेलमा चितवनले काठमान्डुलाई ६१ रनले पराजित गरेको हो।

यस जितसँगै चितवनले अब फाइनल प्रवेशका लागि सुदूरपश्चिम रोयल्ससँग बिहीबार दोस्रो क्वालिफायर खेल्नेछ। यस खेलको विजेताले शनिबार हुने फाइनलमा साविक विजेता लुम्बिनी लायन्ससँग उपाधि भिडन्त गर्नेछ। लुम्बिनी पहिलो क्वालिफायरमा सुदूरपश्चिमलाई हराउँदै यसअघि नै फाइनलमा प्रवेश गरिसकेको छ।

काठमान्डुकै हार, १४३ रनमा सीमित

२०५ रनको विशाल लक्ष्य पछ्याउने क्रममा ब्याटिङ गरेको काठमान्डुले निर्धारित २० ओभरमा ९ विकेट गुमाएर १४३ रन मात्र बनाउन सक्यो।

काठमान्डुका लागि विलियम बोसिस्टोले २८ बलमा ३ चौका र २ छक्कासहित सर्वाधिक ३७ रन बनाए। त्यस्तै, भीम सार्कीले १७ बलमा ३ छक्का प्रहार गर्दै अविजित ३० रन जोडे भने सहान अराचिगेले २४ रन बनाए। अन्य ब्याटरहरूले दोहोरो अङ्कमा रन बनाउन सकेनन्।

चितवनका लागि बलिङतर्फ रिजन ढकालले अत्यन्तै किफायती र धारिलो बलिङ गर्दै ४ ओभरमा मात्र १६ रन खर्चेर ४ महत्वपूर्ण विकेट हात पारे। त्यसैगरी, उसामा मिरले ४ ओभरमा १५ रन दिएर ३ विकेट तथा कुशल मल्ल र सलाउद्दिन खानले १–१ विकेट लिए।

मिशाराको कीर्तिमानी शतक र चितवनको बलियो योगफल

यसअघि टस जितेर पहिले ब्याटिङ गरेको चितवनले कमिल मिशाराको अविजित शतकको मद्दतमा २० ओभरमा ४ विकेट गुमाएर २०४ रन बनाएको थियो।

एनपीएल इतिहासमा चितवनका लागि अहिलेसम्मकै उच्च स्कोर बनाउने क्रममा मिशाराले ५९ बलमा ५ चौका र १० गगनचुम्बी छक्कासहित अविजित १२० रनको शतकीय पारी खेले। यसैगरी, कप्तान रवि बोपाराले ४२ बलमा ३ चौका र २ छक्कासहित ५३ रनको अर्धशतकीय योगदान दिए। मिशारा र बोपाराबीच तेस्रो विकेटका लागि १५४ रनको कीर्तिमानी शतकीय साझेदारी भएको थियो।

काठमान्डुका लागि कप्तान करण केसी र रासिद खानले २–२ विकेट लिए पनि टोलीलाई हारबाट बचाउन सकेनन्।