काठमाडौं । नेकपा (एमाले)का वरिष्ठ उपाध्यक्ष ईश्वर पोखरेलको नेतृत्वमा गोलबद्ध हुन थालेको पूर्वउपाध्यक्ष विद्यादेवी भण्डारीनिकट समूहले आसन्न विधान महाधिवेशनमा फरक मत पेस गर्ने तयारी थालेको छ ।
एमालेले विधान महाधिवेशनको नारा तय गरेलगत्तै भण्डारीको पक्षमा खुलेर लागेका नेताले भण्डारीलाई सक्रिय राजनीतिबाट रोक्न नमिल्ने भन्दै सदस्यता नवीकरण हुनुपर्नेसहितका विषय समेटेर फरक मत राख्ने तयारी गरेका हुन् ।
वरिष्ठ उपाध्यक्ष ईश्वर पोखरेल, उपाध्यक्ष सुरेन्द्र पाण्डे, युवराज ज्ञवाली, स्थायी कमिटी सदस्य कर्ण थापालगायतका नेता विधान महाधिवेशनमा फरक मतसहित छुट्टै प्रतिवेदन पेस गर्ने तयारीमा जुटेका छन् ।
उनीहरूले प्रतिवेदनमा जनताको बहुदलीय जनवाद (जबज)को कार्यान्वयनका ’boutमा नेतृत्वको स्वेच्छाचारी र कमजोर पक्षलाई समेटेर अगाडि बढाउने तयारी गरेको बताएका छन् ।
भण्डारी समूहका नेताले पार्टीको विधानमा ७० वर्षे उमेरहद लागू गर्नुपर्ने, पालिकादेखि केन्द्रसम्मको पदाधिकारीको एउटै पदमा दुई कार्यकालभन्दा बढी आउन नपाउने व्यवस्था कायम गर्नुपर्ने अडानमा छन् । उही पदमा तेस्रो कार्यकालका लागि आउन नमिल्ने उनीहरूको अडान छ ।
भण्डारी पक्षका नेताहरूले विधान महाधिवेशनअघि बस्ने केन्द्रीय कमिटी बैठकमा लिखित प्रतिवेदन पेस गर्न पार्टी नेतृत्वमाथि दबाबसमेत बढाएका छन् । भण्डारीनिकट मानिने स्थायी कमिटी सदस्य कर्णबहादुर थापाले यसअघि लिखित प्रतिवेदन नआएकाले अब केन्द्रीय कमिटीमा लिखित रूपमै पेस गरी छलफल हुनुपर्ने जनाएका छन् ।
‘यसअघि लिखित रूपमा आएन, लिखित रूपमै ल्याएर बैठकमा छलफल गरी विधान महाधिवेशनमा पेस हुने अपेक्षा छ, हामीले सबै प्रस्तावमा छलफल गरेर अगाडि बढ्नुपर्ने भन्दै आएका छौं,’ थापाले भने ।
भण्डारीले राजनीतिमा सक्रिय हुनबाट कसैले रोक्न नसक्ने भन्दै आफ्ना गतिविधिलाई तीव्रता दिँदै आएकी छन् । यसअघि गत १४ असारमा राष्ट्रिय सभागृहबाट सक्रिय राजनीतिमा लागेको घोषणा भण्डारीले गरेकी थिइन् । पार्टीको संगठित सदस्यता नवीकरण गरिसकेर सक्रिय राजनीतिमा लागेपछि एमाले केन्द्रीय कमिटीको बैठकले उनको सदस्यता ‘होल्ड’ गर्दै राजनीतिमा ‘ब्रेक’ लगाउने निर्णय गरेको थियो । सो निर्णयको भण्डारीनिकटका नेताले विरोध गर्दै आएका छन् ।
महाधिवेशनको नारा तय
नेपाल कम्युनिस्ट पार्टी (एमाले)ले विधान महाधिवेशनका लागि ‘राष्ट्रिय शक्ति निर्माण हाम्रो संकल्पः समृद्ध नेपाल सुखी नेपाली राष्ट्रिय गन्तव्य’ भन्ने नारा तय गरेको छ । अगामी २० देखि २२ भदौमा एमालेको दोस्रो विधान महाधिवेशन ललितपुरमा तय भइसकेको छ । त्यसका लागि तयारी तीव्र पारिएको एमालेले जनाएको छ ।
विधान महाधिवेशनमा २ हजार ३ सय ७९ जना प्रतिनिधि सहभागी हुनेछन् । २०७८ मंसिरमा सम्पन्न १०औं महाधिवेशनमा सहभागी प्रतिनिधि नै विधान महाधिवेशनका प्रतिनिधि हुन् ।
२ हजार २ सय २४ जना प्रतिनिधि रहेकामा आयोजक कमिटीसमेत जोड्दा २ हजार ३ सय ७९ जना प्रतिनिधि पुगेको हो । मृत्यु भएका, पार्टी परित्याग गरेका र निलम्बनमा परेकाको प्रतिनिधिबाट नामावली हटाइएको छ । प्रतिनिधिको अद्यावधिक तथ्यांकअनुसार २९ जनाको नामावली हटाइएको छ ।
एमाले संगठन विभाग प्रमुख काशीनाथ अधिकारीका अनुसार विधान महाधिवेशनको तयारी तीव्र रूपमा अगाडि बढेको छ । प्रतिनिधिको टुंगोसहित अन्य आवश्यक तयारी तीव्र रूपमा अगाडि बढेको उनले बताए ।
गत ६ साउनमा बसेको केन्द्रीय कमिटी बैठकबाट पारित अध्यक्ष एवं प्रधानमन्त्री केपी शर्मा ओलीको राजनीतिक प्रतिवेदन, उपाध्यक्ष एवं उपप्रधानमन्त्री तथा अर्थमन्त्री विष्णुप्रसाद पौडेलको विधान मस्यौदा र महासचिव शंकर पोखरेलको सांगठनिक प्रतिवेदन पारित भएको थियो । सोही प्रतिवेदनमा समावेश गर्नुपर्ने विषयका ’boutमा प्रदेश र जिल्ला कमिटीबाट सुझाव माग गरिएको छ । प्राप्त सुझाव समावेश गरी विधान महाधिवेशनमा प्रतिवेदन पेस हुनेछ ।
ओली, पौडेल, पोखरेलसहितका नेताहरू प्राप्त सुझाव समावेश गरी प्रतिवेदन लेखनमा लागेका छन् । अगामी शुक्रबार (१३ भदौ)का लागि तय गरिएको केन्द्रीय कमिटी बैठक स्थगित भएको छ । प्रतिवेदन केन्द्रीय कमिटीमा पेस गरेर छलफल गर्दै पारित गरेपछि विधान महाधिवेशनमा पेस हुनेछ ।
एमाले स्थायी कमिटीका सदस्य एवं प्रचार विभाग प्रमुख राजेन्द्र गौतमले प्रदेश र जिल्लाबाट प्राप्त सुझावलाई प्रतिवेदनमा समावेश गर्दै अन्तिम रूप दिनुपर्ने भएकाले बैठक स्थगित भएको जनाएका छन् । एमालेले यसअघि प्रदेश र जिल्लालाई १० भदौसम्ममा सुझावहरू लिखित रूपमै पेस गर्न निर्देशन गरेको थियो । प्राप्त सुझावहरूलाई प्रतिवेदनमा समावेश गरी केन्द्रीय कमिटीमा निर्णयार्थ पेस भएपछि विधान महाधिवेशनमा पेस हुन्छ ।
पार्टीको खर्चमा भात, आफ्नै खर्चमा बास
ललितपुरको गोदावरीमा हुने विधान महाधिवेशनका लागि तयारी तीव्र रूपमा अगाडि बढेको छ । यसअघि पहिलो विधान महाधिवेशनसमेत गोदावरीमै सम्पन्न भएको थियो । नेताहरूलाई विभिन्न कार्यका लागि पार्टीले जिम्मेवारी तोकेरै काममा लगाएको छ । पार्टीले विभिन्न समिति गठन गरेको छ ।
प्रचार तथा प्रकाशन उपसमितिको संयोजन राजेन्द्र गौतमले गरिरहेका छन् । संगठन विभाग प्रमुख काशीनाथ अधिकारीको नेतृत्वमा प्रतिनिधि व्यवस्थापन, विनोद श्रेष्ठको नेतृत्वमा हल व्यवस्थापन तथा मञ्च व्यवस्थापन समिति बनेको छ ।
लालबाबु पण्डितको नेतृत्वमा अति आवश्यक आवास व्यवस्थापन समिति बनेको छ । यद्यपि, प्रतिनिधिलाई खानाको व्यवस्था भए पनि बस्ने व्यवस्था भने आफैं गर्नुपर्ने भनिएको छ । तर, बासको व्यवस्था आफैंले गर्न नसक्नेलाई पार्टीले व्यवस्थापन गर्नेछ ।
यसैगरी, भीष्म अधिकारीको नेतृत्वमा खाद्य व्यवस्था र केन्द्रीय सचिवालय व्यवस्थापन, कृष्णगोपाल श्रेष्ठको नेतृत्वमा स्वास्थ्य व्यवस्थापन समिति, भानुभक्त ढकालको नेतृत्वमा स्वयंसेवक व्यवस्थापन समिति र हेमराज राईको नेतृत्वमा सांस्कृतिक फाँटको संयोजन गर्ने जिम्मेवारी तोकिएको छ । जिम्मेवारी तोकिएअनुसार काम तीव्र गतिमा अगाडि बढेको प्रचार विभाग प्रमुख गौतमले जनाएका छन् ।
गोदावरीको हल अनुगमनसहित सचिवालय, मञ्च व्यवस्थापनदेखि स्वयंसेवक परिचालनलगायतका कामहरू भइरहेको गौतमले जनाए ।
_20250725082620.JPG)
