रौतहटको रोडमा सुटकेशभित्र भेटिएको शवको पहिचान

रौतह। रौतहटको सदरमुकाम गौर–सिर्सिया सडकखण्ड अन्तर्गत मुडवलवा रोड नजिक सुटकेशभित्र फेला परेको शवको पहिचान खुलेको छ। प्रहरीका अनुसार शव ३० वर्षीया रुविदेवि साहको हो।

स्थायी ठेगाना माधवनारायण-६ मधोपुर, घर भारतको बिहार मुजफ्फरपुर भए पनि उनी हाल गौर-२, महादेवपाट्टीमा डेरा गरी बस्दै आएकी थिइन्। मृतक रुविको चार वर्षीय एक छोरा रहेको प्रहरीले जनाएको छ।

प्रहरीले दिएको जानकारीअनुसार रुविका श्रीमान शिवकुमार साह ९३५० भारत, बिहार, मुजफ्फरपुर जिल्ला सकरा बेल निवासी तथा साधुशरण साहका छोरा हुन्। मृतक रुवि, रौतहट माधवनारायण नपा-६ बस्ने रामविनोद साह मण्डलकी धर्मपत्नी अन्दाजी ५० वर्षीया सुनिच्छा देवीकी छोरी हुन्।

शनिबार राति करिब साढे १० बजेतिर सडक किनारमा डोरीले बाँधिएको अवस्थामा भेटिएको सुटकेश खोलेपछि अन्दाजी ३० वर्षीया महिलाको शव फेला परेको प्रहरीले जनाएको छ। प्राथमिक रूपमा शवसँगै भेटिएका साडी र चुराका आधारमा महिला भएको अनुमान गरिएको थियो।

शवलाई डाेरी बेरिएको अवस्थामा सुटकेशमा राखिएकाले हत्या गरी फालिएको हुन सक्ने आशंका प्रहरीले गरेको छ। घटनास्थलमा जिल्ला प्रहरी कार्यालय रौतहटका प्रवक्ता डिएसपी राजु कार्कीको नेतृत्वमा नेपाल प्रहरी र सशस्त्र प्रहरी परिचालन गरिएको थियो। मुचुल्कापछि शवलाई पोस्टमार्टमका लागि प्रादेशिक अस्पताल गौर पठाइएको डिएसपी कार्कीले जानकारी दिए।

घटनाबारे सत्यतथ्य पत्ता लगाउन प्रहरीले नजिकैको विद्यालयमा जडान गरिएको सिसीटिभी फुटेज संकलन गरेको छभने मृतकको मोबाइल कल डिटेल निकाल्ने तयारी भइरहेको जनाएको छ।