काठमाडौँ । राजावादी आन्दोलनसँग जोडेर प्रहरीले पक्राउ गरेका ४१ जनामध्ये एकजना राष्ट्रिय स्वतन्त्र पार्टी सम्बद्ध नेता रहेको पाइएको छ । उनी रास्वपाको निर्वाचन क्षेत्र समिति खोटाङका पूर्वसंयोजक हुन् ।
प्रहरीले सार्वजनिक गरेको ४१ आन्दोलनकारीको सूचीमा ६३ वर्षीय राईको नाम १७ नम्बरमा छ । उनलाई भाटभटेनीको घटनाको सीसीटीभी फुटेज हेरेर पक्राउ गरिएको चर्चा भए पनि प्रहरीले केही बताएको छैन । पक्राउ परेका अरूसँगै उनको पनि सुरुमा ५ दिन र हिजो फेरि छ दिन म्याद थपेर अनुसन्धान भइरहेको छ ।
डा. राई पछिल्लो समय रास्वपामा सक्रिय भने थिएनन् । गत पुस १३ गते भएको खोटाङ रास्वपाको अधिवेशनमा उनी अध्यक्षमा लडेर पराजित भएका थिए । केन्द्रीय सदस्य तथा सांसद तोसिमा कार्कीको उपस्थितिमा दिक्तेलमा भएको सो भेलाबाट मुकुन्दकृष्ण थापा राप्रपाको जिल्ला अध्यक्षमा निर्वाचित भएका छन् । थापाले ३० मत ल्याउँदा राईलाई ६ मत मात्रै आएको थियो ।
चुनाव हारेपछि राई रास्वपामा निष्क्रिय भएका हुन् । त्यसपछि उनी राजावादी अभियानहरूमा देखिन थालेका थिए । यद्यपि, उनले रास्वपाको सदस्यता परित्याग गरेका छैनन् भने रास्वपाले पनि उनलाई कारबाही गरेको छैन ।
रास्वपाका कार्यवाहक प्रवक्ता मनिष झाले डा. राई अहिले पार्टीको कुनै पनि जिम्मेवारीमा नरहेको बताए । उनले कुरा गर्दै भने, ‘उहाँ पहिले खोटाङको संयोजक हुनुहुन्थ्यो, तर अहिले कुनै पनि पदमा हुनुहुन्न । उहाँले विचार परिवर्तन गरेर अर्को धारमा लाग्नुभएको सूचना पाएका छौँ ।’ रास्वपाका सांसद गणेश पराजुलीले पार्टी नीति विपरीतका गतिविधिमा लागेको पाइएमा साधारण सदस्यता खारेज गरिने बताए ।
उनले भने, ‘उहाँले साधारण सदस्यता त्याग्नुभएको जस्तो लाग्दैन । यदि कुनै पनि अवाञ्छित गतिविधिमा लाग्नुभएको छ भने पार्टीले कारबाही गर्छ । राईले रास्वपा आउनुअघि लामो समय कांग्रेसको सक्रिय राजनीति गरेका थिए । खोटाङ रावाबेसी गाउँपालिका १ घर भएका उनले अमेरिकाबाट पीएचडी गरेका हुन् । कांग्रेसमा हुँदादेखि नै उनको राजसंस्थाप्रति रुझान रहेको बताइन्छ ।
राजावादीको तीनकुने आन्दोलनअगाडि राईले फेसबुकबाट आन्दोलनमा सरिक हुन खोटाङवासीलाई अपिल गरेका थिए ।
