काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले सभामुख देवराज घिमिरेलाई भेटेर आफ्नो सांसद पद निलम्बन फुकुवाको लागि ध्यानाकर्षण गराएका छन् ।
आज उपसभापति डीपी अर्याल, प्रमुख सचेतक सन्तोष परियारसहितको टोली लिएर रवि संसद सचिवालय पुगेका थिए । उनले आफ्नो निलम्बन गैरकानूनी र राजनीतिक प्रतिशोधपूर्ण रहेको भन्दै फुकुवा गरिदिन आग्रह गरे । संसद सचिवालयबाट बाहिर निस्किँदै रविले संसदको विषय संसदबाटै निरुपण होस् भन्ने आफूले चाहेको बताए ।
‘यो मुद्दा मामिलामा धाउने कुरा होइन । भोलि सरकार परिवर्तन हुँदा अरुको मात्र होइन, आफ्नै दलका विरोधी सांसद पनि राजनीतिक हतियार बन्न सक्ने कुरामा ध्यानाकर्षण गरायौं । चितवनका जनताले २/२ पटक भोट दिएर पठाएका छन् मेरो सांसद पद कसरी खाली हुन्छ ?’, उनले भने ।
‘जन्मिनुभन्दा अघि बुवाको सम्पत्ति र विवाहभन्दा अघि श्रीमतीको सम्पत्तिलाई कसुर मानेर खाली सांसद पद कसरी निलम्बन गर्न सकिन्छ भनेर दूषित मनसाय राखेर दर्तामात्र गरिएको अदालतमा टेकाइएको मुद्दाको आधारमा निलम्बन हुनु हुँदैन भनेर भनेको छु । मुद्दा किनारा लाग्न कति समय लाग्छ हामीलाई थाहा छ नि ! यसले भोलि प्रतिशोधको रूप लिन्छ’, लामिछानेले भने ।
यो अधिवेशनको आजको अन्तिम दिनमै यसलाई किनारा लगाइदिन आग्रह गरेको रविले बताएका छन् । उनले यसमा सभामुख सकारात्मक देखिएको र कानूनी विषय हेर्ने र आवश्यक छलफल गर्ने भनेको जानकारी गराए । आफू आशावादी रहेको पनि रविले सुनाए ।
यो हतियार प्रयोग गरेर सरकारको संख्यामै तलमाथि हुनसक्ने सम्भावना देखिएको भन्दै उनले भने, ‘मुद्दा टेकाइदिए त पुग्यो ।’ सहकारी ठगीसँगै सम्पत्ति शुद्धीकरणको मुद्दा दर्ता भएपछि लामिछानेको सांसद पद पुस ८ गते संसद सचिवालयले निलम्बन गरेको थियो ।
