झापा । मोटरसाइकल दुर्घटनामा परी झापामा दुईजनाको मृत्यु भएको छ ।
मंगलबार राति साढे ८ बजेको समयमा पूर्व–पश्चिम राजमार्गअन्तर्गत मेचीनगर नगरपालिका– १३ कालिझोडामा बिर्तामोडबाट चारआलितर्फ जाँदै गरेको मे ६ प ८३२० नम्बरको मोटरसाइकलले पैदल यात्रीलाई ठक्कर दिँदा दुर्घटना भएको थियो ।
मोटरसाइकलको ठक्करबाट पैदल यात्री सनाखत नभएको पुरुषलाई घाइते अवस्थामा उपचारका लागि बीएण्डसी अस्पताल बिर्तामोड पठाइएको थियो । उनको उपचारको क्रममा राति साढे १० बजे मृत्यु भएको जिल्ला प्रहरी कार्यालय झापाले जनाएको छ ।
त्यस्तै दुर्घटनामा परी मोटरसाइकलमा सवार मेचीनगर–९ का २९ वर्षीय मन्दिप मेचे र सोही ठाउँका २५ वर्षीय सागर मेचे समेत घाइते भएका थिए । उनीहरूलाई पनि उपचारका लागि सोही अस्पतालमा लगिएकोमा सागरको बुधबार दिउँसो २ बजे उपचारको क्रममा मृत्यु भएको प्रहरीले जनाएको छ ।
