परलोक जाँदै छु भनेर श्रीमतीका नाममा फेसबुकमा भावुक स्टाटस लेखेर बेपत्ता भएका चर्चित रक्तदाता अर्जुन मैनाली मृत भेटिएका छन् । नेपाली समयअनुसार सोमबार बिहान परलोक जाँदै छु भनेर श्रीमती ताराका नाममा फेसबुकमा भावुक स्टाटस लेखेर बेपत्ता भएका मैनाली अमेरिकाको नर्थ क्यारोलिनास्थित लट्टा नेचर प्रिजर्भस्थित पार्कमा कारभित्र मृत फेला परेका हुन् । मैनालीको शव जलेको अवस्थामा कारभित्र फेला परेको छ ।
२०६ पटकमा १०२ लिटर रगत दान गरेर विश्वभर चर्चा कमाएका मैनालीका श्रीमती, एक छोरा र एक छोरी छन् । छोरीको भने मैनालीले केही समयअघि विवाह गरिदिएका थिए । छोरीको बिहे एक वर्ष ढिलो हुने भएकाले आफू आत्महत्या गर्नबाट यसअघि रोकिएको पनि उनले उल्लेख गरेका छन् । 'छोरीको बिहे सकिन्जेलसम्म म घाइते भई बाँची रहेको थिएँ । मेरो कारणले छोरीको बिहे १ वर्ष ढिलो नहोस् भन्नेमा पनि सचेत थिएँ । बिहे सम्पन्न भयो,' उनले लेखेका छन् ।
काभ्रेपलान्चोकको कोटथुम्काका मैनाली रक्तदाताका रूपमा विश्वभर चर्चित थिए । मैनालीलाई अमेरिकन रेडक्रसले सन् २००९ मा ‘द गुड नेइबर’ सम्मान दिएको थियो । नेपाली समयअनुसार सोमबार बिहान श्रीमती ताराका नाममा भावुक स्टाटस लेख्दै मैनालीले चार दिनअघि अग्निको बाटोबाट परलोन जान भन्दै सेतो का भाडामा लिएको उल्लेख गरेका छन् । उनले स्टाटसमा लेखेका थिए, 'चार दिनअगाडि अग्निको बाटोबाट म परलोक जान सेतो कार भाडामा लिएँ । कारलाई कतै लुकाएर राख्न भुलेछु । छोराले सोध्यो, 'यो कारमा को आएको छ ? त्यसपछि यो कार लुकाएँ ।'
मैनालीले त्यही कारभित्र आत्मदाह गरेको देखिएको छ । मनलाई बेसमारी बाँधेर घरबाट निस्किएको स्टाटस मैनालीले लेखेका थिए । 'जब परलोकका लागि घरबाट बाहिर निस्कन खोज्छु तब झलक्क तिम्रो मलिन अनुहार आँखा अगाडि देख्थेँ । अनि मेरो आँखा रसाउँथे । मन रुन्थ्यो । हरेक पल बाहिर निस्कन खोज्थेँ । फेरि उहीँ हुन्थ्यो,' उनले फेसबुकमा लेखेका थिए, 'आज मनलाई बेसमारी बाँधेर निस्केँ । अब म केही बेरमा परमधाम पुग्नेछु । घरमा तिमी र छोरो मात्रै हुने छौँ । केही दिन तिमीलाई धेरै गाह्रो हुनेछ । न आत्तिनु । तिम्रो पीडालाई शक्तिमा बदल्न भगवानले साथ दिउन् ।'
मैनालीले सालो रमेश र श्रीमती अस्मिताका कारण आफू तनावमा रहेको पनि उल्लेख गरेका थिए । उनले लेखेका छन्, 'आज म परलोक जादै छु । सालो रमेश र उसकी श्रीमती अस्मिताले मलाई गत अप्रिलमा तिम्रै अगाडि शब्दबाटै मार्न प्रयास गरेको तिमीलाई थाहै छ । मानिसलाई मार्न हतियार चाहिदो रहेनछ, शब्द पनि काफी हुँदोरहेछ । जीवनभरी सँगै बस्ने प्यारी श्रीमतीको आफन्तसँग के झगडा गर्नु भनेर शान्त रहेँ । मेरो आफ्नै स्वास्नीको सामुन्ने तातो न छारोको कुरामा नामर्द, निच, खत्तम परिवारको मानिस, संस्कार नभएको मानिसजस्ता शब्दले प्रहार गर्दा मेरो श्रीमतीको मनमा के भयो होला ! यसरी उसले आफू असल परिवार र संस्कार भएको उदाहरण पनि दियो । त्यो पनि हामी सुत्न लागि रहेको समयमा रातको १०:१५ बजे तिनिहरूका ९-१० वर्षकी छोरी, १३-१४ वर्षका छोरासहित हाम्रो घरमा आएर गरेको झगडाको दुरगामी असर दुई-तीन पुस्तासम्म त पुग्ने नै भइहाल्यो । अझ मेरो छोरो सुत्न लागिसकेकोलाई समेत उठाएर झगडा गर्दा उसको मनमा के भयो होला ! त्यो झगडाले छोरोको भोलिपल्टको जाँचमा सहभागी हुन नसकेको तिमीलाई थाहा नै छ ।'
उनले सालो रमेशले यसरी अपराध नै गर्ला जस्तो नलागेको उल्लेख गरेका छन् । मैनालीले फेसबुकमा लेखेका छन्, 'रमेश ग्रिडी र सेल्फिस त छँदै थिए, तर यसरी क्राइम नै गर्ला जस्तो लागेको थिएन । उसले आफ्नो स्वास्नीको गर्मीलाई शीतल बनाउन तिम्रो घरबार बिगार्यो, विधुवा बनायो, छोरोलाई टुहुरो बनायो, मेरो आमाको काख रित्यायो । यत्रो ठूलो नोक्सान बनाएर उसले के जित्यो ? के पायो ? अब तिम्रो क्षतिलाई उसले सुनकै घर बनाएर दिए पनि पूर्ति हुन सक्ला त ?'
