काठमाडौं । ६० किलो सुन प्रकरणमा पक्राउ परेका बेल्जियम मूलका चिनियाँ नगारिक दावा छिरिङ ‘व्यवस्थापक’को भूमिकामा देखिएका छन् । हङकङबाट चिनियाँ तस्करले ल्याएका सुन काठमाडौँ उपत्यकामा व्यवस्थापन गर्न दावाको संलग्नता देखिएको केन्द्रीय अनुसन्धान ब्युरोको अनुसन्धान निष्कर्ष छ ।
केन्द्रीय अनुसन्धान ब्युरो ‘सिआईबी’का अनुसन्धान अधिकृतहरूका अनुसार सुनमा दावाको लगानी पुष्टि भएको छैन । काठमाडौँमा बसेर परिआउँदा ‘जे पनि गर्ने’ स्वभावका दावाले सुन तस्करीमा संलग्नहरूका लागि फ्ल्याट खोजिदिने, युवती मिलाइदिने र ठमेल स्थित होटेल भियानामा खाने–बस्ने व्यवस्था मिलाउने गरेका थिए । होटेल भियना उनकी पत्नी अमला रोकाको नाममा छ । ‘व्यवस्थापनको पाटोमा दावाको संलग्नता देखिएको छ’ अनुसन्धानमा संलग्न एक जना अधिकृत भन्छन्, ‘व्यवस्थापन गरेबापत दावाले सुन कारोबारीबाट कमिसन लिने गरेको देखिन्छ ।’ दावा लामो समयदेखि काठमाडौँमा बस्दै आएका छन् ।
दावा छिरिङले नक्कली कागजात पेस गरेर नेपाली नागरिकता लिएको पुष्टि भएको छ । तिब्बतीयन मूलका बेल्जियन नागरिक छिरिङले निमा तामाङको नाममा जिल्ला प्रशासन कार्यालय काभ्रेपलान्चोकबाट नागरिकता लिएको गृह मन्त्रालयको छानबिन निष्कर्ष छ । छिरिङलाई राजस्व अनुसन्धान विभागको टोलीले साउन १४ मा पक्राउ गरेको थियो । सुन प्रकरणमा हालसम्म २७ जना पक्राउ परेका छन् ।
