जिप दुर्घटना हुँदा नवविवाहित जोडीसहित ५ जनाको मृत्यु

बैतडी । बैतडीको पाटन नगरपालिका–१ सकार थलीमा गएराती जिप दुर्घटना हुँदा पाँच जनाको मृत्यु भएको छ । मृत्यु हुनेमा पाटन नगरपालिकाकी ४० वर्षीया जानकी भट्टराई, १३ वर्षीय विनोद भट्टराई, ७२ वर्षीया रमा भट्टराई, २४ वर्षीय प्रेम चुनारा र २० वर्षीया मनिषा विक रहेका छन् ।

मृतक मध्ये जानकीको पाटन प्राथमिक स्वास्थ्य केन्द्रमा मृत्यु भएको हो भने बाँकी चार जनाको घटनास्थलमै मृत्यु भएको हो । मृत्यु भएका प्रेम र मनिषाको १० दिन अघि मात्र विवाह भएको थियो । उनीहरु घरबाट माईती तर्फ जाँदै गरेका थिए ।

दुर्घटनामा परि अन्य पाँच जना घाईते भएका छन् । उनीहरु मध्ये दुई जनालाई जिल्ला अस्पताल डडेल्धुरा र बाँकीलाई पाटन प्राथमिक स्वास्थ्य केन्द्मा लगिएको छ ।

बैतडीको पाटन बजारबाट कैलपाल जाँदै गरेको से १ ज ८८८ नम्बरको जिप दुर्घटना भएको हो । जिपमा ११ जना सवार थिए । जिप चालक पाटन ५ बसन्तरपुरका खेमराज पाण्डेय फरार रहेका छन् । जीप सडकबाट एक सय मिटर तल खसेको छ । कच्ची, चिप्लो र भिरालो बाटोका कारण दुर्घटना भएको हुनसक्ने प्रहरीले जनाएको छ ।