काठमाडौं । प्रधानमन्त्री केपी ओलीले आफू नेतृत्वको नेकपा आधिकारिक भएको दावी गरेका छन्। अंग्रेजी नयाँ वर्षको अवसरमा प्रवासी नेपाली एकता मञ्चहरुले संयुक्त रुपमा आयोजना गरेको भर्चुअल कार्यक्रमलाई सम्बोधन गर्दै प्रधानमन्त्री ओलीले पार्टीको वैधानिकता निर्वाचन आयोगबाट नभई जनताबाट प्राप्त हुने बताएका हुन्।
उनले निर्वाचन आयोगमा एउटा निवेदन दिँदैमा वैधानिकता प्राप्त नहुने बताए। ‘कसैले एउटा चिर्कटो निर्वाचनमा आयोगमा पुर्याउँदैमा वैधानिकता प्राप्त हुँदैन’, प्रधानमन्त्री ओलीले भने, ‘उहाँहरु (प्रचण्ड–नेपाल) वैधानिकताको निवेदन बोकेर निर्वाचन आयोग जानुभएको छ, हामी वैधानिकताको दर्खास्त हाल्न कहीँ गएका छैनौँ।’
उनले आफूहरु कहाँ छौँ भन्ने कुरा जनताले देखेको भन्दै प्रचण्ड–नेपालहरु सडकमा छातीका कागज टाँसेर यहाँ छौँ भन्ने अवस्थामा आइपुगेको बताए। ‘हामी आधिकारिक हौँ, त्यसैले हामी यहाँ छौँ भनेर कागज छातीमा कागज टाँसेर बस्नुपर्ने अवस्थामा छैनौँ’, उनले भने, ‘उहाँहरु सडकमा बस्नु पर्ने अवस्था आइसकेको छ।’
उनले आफूहरु आधिकारी पार्टी भएका कारण नयाँ पार्टी दर्ता गर्न निर्वाचन आयोग जानू नपर्ने बताए।
_20241127162555.jpg)
