काठमाडौं। बडादसैँको मुख्य दिन (विजयादशमी) मा मान्यजनको हातबाट टीका र जमरा थाप्न आउजाउ गर्ने तयारीमा हुनुहुन्छ भने मौसमको अवस्थाबारे जानकार रहनु उपयुक्त हुनेछ। मौसम पूर्वानुमान महाशाखाका अनुसार हाल देशमा पश्चिमी वायुको आंशिक प्रभाव रहेको छ।
दसैँको मुख्य दिन हिमाली र पहाडी भू-भागका एक-दुई स्थानमा हल्का वर्षा र हिमपातको सम्भावना रहे पनि तराई क्षेत्रमा भने मौसम मुख्यतया सफा रहनेछ।
महाशाखाका अनुसार दसैँको मुख्य दिन दिउँसो देशको हिमाली तथा पहाडी भू-भागमा आंशिक बादल लाग्नेछ भने तराई भू-भागमा मौसम मुख्यतया सफा रहनेछ। यसैगरी, हिमाली भू-भागका साथै कोशी र गण्डकी प्रदेशका पहाडी भू-भागका एक-दुई स्थानमा छिटफुट वर्षा तथा हल्का हिमपातको सम्भावना रहेको छ।
रातिको समयमा भने कोशी र गण्डकी प्रदेशका हिमाली र पहाडी भू-भागमा आंशिक बदली रहनेछ भने देशका बाँकी हिमाली तथा पहाडी क्षेत्रमा मौसम मुख्यतया सफा रहने अनुमान गरिएको छ। यस्तै, तराईका भू-भागमा बिहानपख केही स्थानमा हुस्सु वा कुहिरो लाग्न सक्ने भएकाले यात्रा गर्दा सावधानी अपनाउन महाशाखाले आग्रह गरेको छ।
