काठमाडौं। त्रिभुवन अन्तर्राष्ट्रिय विमानस्थलको क्षमता विस्तारको काम अन्तिम चरणमा पुगेको छ। हवाई यातायात क्षमता अभिवृद्धि आयोजना अन्तर्गत, ट्याक्सी वे र एप्रोन विस्तारलगायतका काम लगभग पूरा हुने चरणमा पुगेको हो।
नेपाल नागरिक उड्डयन प्राधिकरण (क्यान)ले त्रिभुवन विमानस्थलमा हवाई यात्रुकोे चाप अत्यधिक वृद्धि भएसँगै गुरुयोजना अध्यावधिक गरी क्रमिक रूपमा क्षमता विस्तारको कार्यलाई तिब्रता दिएको हो।
मनसुनको समयमा पनि कामलाई तिब्रता दिइएकाले निर्धातिर मितिमै काम सम्पन्न हुने प्राधिकरणका महानिर्देशक प्रदीप अधिकारीले जानकारी दिए। यो काम सन् २०२० अगस्ट २० बाट सुरु भएको थियो। अहिलेसम्म ७५ प्रतिशत काम सकिएको छ।
धावन मार्ग भन्दा ७५ मिटरभित्रको क्षेत्र अत्यधिक ‘सुरक्षा संवेदनशील क्षेत्र’ रहेकोले गत बैशाखसम्म ५ महिना राती १० घण्टा विमानस्थल बन्द गरेर काम गरिएको थियो। उडान रोकेको भन्दै प्राधिकरणको त्यतिबेला आलोचना भएको थियो। राति उडान रोकेपनि विमानस्थलको आय र यात्रुको संख्या गतवर्षको भन्दा कमी नभएको अधिकारीले बताए।
नेपाल सरकार र नागरिक उड्डयन प्राधिकरणको संयुक्त ७ अर्ब हाराहारी लगानीमा अन्तर्राष्ट्रिय एप्रोन र एप्रोनलाई उत्तरतर्फको रन–वेसँग जोड्ने ट्याक्सी-वे निर्माण भइरहेको छ। यो काम चिनियाँ ठेकेदार कम्पनी एभिक इन्टरनेसनलले गरिरहेको छ। दक्षिण-पश्चिमतर्फ समानान्तर ‘ट्याक्सी वे’, उत्तरतर्फ अन्तर्राष्ट्रिय विमान पार्किङ (एप्रोन), पूर्वतर्फ ह्याङ्गर क्षेत्रको निर्माण कार्य आगामी पुसमा सकिने छ।
निर्माण सम्पन्न भएपछि अन्तर्राष्ट्रिय जहाजको पार्किङ क्षमता ११ बाट १८ मा पुग्ने छ। त्यस्तै धावन मार्गको क्षमतामा पनि २५ प्रतिशतले वृद्धि भइ एयर ट्राफिक व्यवस्थापन सहज हुने अधिकारीको विश्वास छ।
ट्याक्सी वे र अन्य संरचनाको विस्तारपछि विमानस्थलको यात्रु क्षमता करिब १ करोड पुग्ने अनुमान छ। विमानस्थलबाट अहिले दैनिक तीन सय उडान भइरहेका छन्। दुई वर्षदेखि जारी स्तरोन्नतीको कार्य बीचमा रहेको आयल निगमको हवाई इन्धन डिपोका कारण पश्चिम तर्फको काम भने अहिले रोकिएको छ। आयल निगमको डिपो स्थानान्तरणका लागि प्राधिकरणले उत्तर तर्फ जमिन उपलब्ध गराइसकेको छ।
निगमले डिपो सारेलगत्तै पश्चितर्फको समानान्तर ट्याक्सीवेले पूर्णता पाउने छ। विमानस्थलका यी आयोजना सकिएसँगै प्राधिकरणले अन्तराष्ट्रिय यात्रु टर्मिनल अत्याधुनिक सुविधा सम्पन्न बनाउने लक्ष्य लिएको छ। ३००० मिटर लामो रहेको धावन मार्गको यसअघि नै स्तरोन्नती गरि ३३०० मिटर बनाइ सकिएको छ।
_20250725111808.JPG)
