विश्वविद्यालय पदाधिकारी नै असुरक्षित भएको भन्दै शिक्षामन्त्रीले मागिन् सुरक्षा

काठमाडौं । शिक्षा मन्त्री विद्या भट्टराईले त्रिभुवन विश्वविद्यायलयमा केही दिनदेखि पदाधिकारीमाथि हमला गर्न खोजिएको भन्दै सुरक्षा माग गरेकी छन् ।

उनले सामाजिक सञ्जालमार्फत् भनेकी छन्, “त्रिभुवन विश्वविद्यालयमा केही दिनदेखि पदाधिकारीहरुमाथि हमला गर्न खोज्नु र प्राध्यापकहरुलाई फोन गर्दै धम्की दिने गरेको कारण सिंगो विश्वविद्यालय असुरक्षित बनेको छ । त्रिभुवन विश्वविद्यालयमा सुरक्षाका लागि व्यवस्थित प्रबन्ध गर्न म गृहमन्त्रीसँग जोडदार माग गर्दछु । गुण्डागर्दी गर्ने छुट कसैलाई छैन । यस्तो क्रियाकलापमा संलग्न व्यक्तिहरुलाई कानुनी दायरामा ल्याई कारबाही गर्नसमेत म गृह मन्त्रालयलाई गम्भीरताका साथ अनुरोध गर्दछु ।”

उनले सामाजिक सञ्जालमा यस्तो लेखेको केहीबेरमा आफूले आवेगमा आएर सार्वजनिक अपिल नगरेको बताएकी छन् ।उनले भनेकी छन्, “मैले सार्वजनिक अपिल गर्नुपर्ने भएर नै गरेको हुँ । कुनै आवेगमा आएर लेखेको होइन । विगत पाँच दिनदेखि लगातार सम्पर्क र समन्वय गरेको कुरासमेत जानकारी गराउन चाहन्छु ।”