नवलपुरको देवचुलीका बिद्यार्थीहरुले कसैले केही काम बनाईदिन घुस मागे नदिने प्रतिबद्धता जनाएका छन् । भ्रष्टाचारविरुद्धको अन्तराष्ट्रिय दिवसका अवसरमा वागेश्वरी असल शासन क्लव बास नवलपूरले गरेको शिक्षक तथा बिद्यार्थी अभिमुखीकरण कार्यक्रममा बिद्यार्थीहरुले बिद्यालय तथा अन्य सेवा दिने स्थानमा काम पर्दा कसैले घुस मागे नदिने बरु घुस मागेको बारे नजीकको प्रशासन अथवा भ्रष्टाचारविरुद्ध काम गर्ने सरोकारवालाई उजुरी गर्ने प्रतिबद्धता जनाएका हुन् ।
देवचुलीको नेपाल माध्यमिक बिद्यालयमा भएको अभिमुखीकरण कार्यक्रममा बिद्यार्थीहरुले कस्तो अवस्थामा घुस मागेको हुन्छ भन्ने कुरा नै आफुहरुलाई बुझाउन पर्ने बताएका थिए । कार्यक्रममा बास नवलपूरका उपाध्यक्ष वेदप्रसाद काफ्लेले के गर्दा भ्रष्टाचार हुन्छ ।
कस्तो कस्तो अवस्थामा को कस्ले घुस माग्न सक्छन् त्यस्तो अवस्था कसलाई उजुरी गर्ने भन्ने बारे सहजीकरण गर्नुभएको थियो । उपाध्यक्ष काफ्लेले कुनै पनि सामान किनिसकेपछि वा कुनै कार्यालयमा शुल्क दिएपछि अनिवार्य बिल माग्न बिद्यार्थीहरुलाई अनुरोध गर्नुभयो । बिद्यार्थीहरुले आफ्ना अभिभावकलाई पनि यसबारेमा बुझाउन अनुरोध गर्दै उहाँले कतै भ्रष्टाचार भएको छ भन्ने महशुस भए तुरुन्तै बास नवलपूरमा खबर गर्न सुझाउनुभयो ।
बिद्यालयमा प्राचार्य शिव देवकोटाले बिद्यालयलाई भ्रष्टाचारमुक्त बनाउने प्रतिबद्धता जनाउनुभयो । कार्यक्रममा बोल्दै बास केन्द्रिय सदस्य यदुनाथ सिग्देलले भ्रष्टाचार अन्त्य गर्न नयाँ पुस्तालाई बुझाउन र सिकाउन आवश्यक रहेको बताउनुभयो । आजका बिद्यार्थीलाई भ्रष्टाचार गर्न नहुने र गरे र सजाय हुने भन्ने बुझाउन नसके भोली यिनै बिद्यार्थीबाट भ्रष्टाचार हुनेतर्फ सचेत हुन आग्रह गर्नुभयो ।
बास नवलपुरले नियमित कार्यक्रम अन्तर्गत देवचुली नगरपालिकामा कार्यक्रम गरेको सचिव तेजेन्द्र रानाले जानकारी दिनुभयो । रानाले अभिमुखीकरण कार्यक्रमपछि बिद्यार्थी र शिक्षकहरुले भ्रष्टाचार विरुद्ध सामुहिक प्रतिबद्धता जनाएर हस्ताक्षर गरेको जानकारी दिनुभयो ।
