काठमाडौं। पार्टीको कार्यकारी भूमिका पुनरागमन गरेसँगै राष्ट्रिय स्वतन्त्र पार्टी (रास्वपा)का सभापति रवि लामिछानेले सदनमा फर्किन कसरत थालेका छन्। सोमबार पार्टींको कार्यकारी भूमिकामा फर्किएका लामिछानेले मंगलबार सभामुख देवराज घिमिरेलाई भेटेर सांसद पद निलम्बन फुकुवा गरिदिन आग्रह गरेका हुन्।
उपसभापति डिपी अर्याल र प्रमुख सचेतक सन्तोष परियारसहित मंगलबार बिहान सभामुखलाई भेट्न संसद् सचिवालय पुगेका उनले आफ्नोे निलम्बन गैरकानुनी र राजनीतिक प्रतिशोधपूर्ण रहेको भन्दै फुकुवा गरिदिन आग्रह गरेका हुन्।
यसअघि गत माघ १८ गते संसद्को हिउँदे अधिवेशन सुरु हुनुअघि सभामुख घिमिरेलाई भेटेर आफ्नो सांसद पद निलम्बन फुकुवाको माग गर्दै निवेदन दिएका थिए। तर, सभामुख घिमिरेले सांसद पद निलम्बनबारे तत्कालै निर्णय लिन नसकिने जवाफ दिएपछि उनी निराश हुँदै फर्किएका थिए। सहकारी ठगी, संगठित अपराध र सम्पत्ति शुद्धीकरणलगायत कसुरमा अदालतमा मुद्दा दायर भएपछि गत ८ पुसमा लामिछाने निलम्बनमा परेका थिए। तर, यो प्रक्रियासंगत नरहेको रास्वपा नेताहरूको तर्क छ। संसद्को नियमावलीले अदालतले पुर्पक्षका लागि थुनामा पठाउने निर्णय गरेको खण्डमा मात्रै सांसद पद निलम्बनमा पर्ने उनीहरूको तर्क छ।
सक्रिय राजनीतिमा फर्किएपछि फेरि उनले संसद्को विषय संसद्बाटै निरूपण होस् भन्ने आफूले चाहेको उनले बताए। ‘यो मुद्दा मामिलामा धाउने कुरा होइन। भोलि सरकार परिवर्तन हुँदा अरूको मात्र होइन, अफ्नै दलका विरोधी सांसद पनि राजनीतिक हतियार बन्नसक्ने कुरामा ध्यानाकर्षण गरायाैं,’ उनले भने, ‘भोलि यो हतियार प्रयोग गरेर सरकारको संख्या नै तलमाथि हुनसक्ने सम्भावना हुन्छ भन्ने कुरा राख्नुभयो । यसप्रति उहाँ सचेत र चिन्तित पनि हुनुहुन्छ।’ सभामुखबाटै सांसद पद फुकुवा गर्ने विश्वास भएकाले अहिले अदालत नगएको उनको भनाइ थियो।
सम्पत्ति शुद्धीकरणको मुद्दा राजनीतिक हतियार बन्नसक्नेप्रति सभामुख घिमिरे चिन्तित देखिएको उनले बताए। ‘मैले त्यसो भए आज सदनमा छलफल गरौँ न, एक पटकमा कतिजना सम्मलाई निलम्बन गर्न पाउने हो, किनभने मुद्दा टेकाइदिए त पुग्यो, मुद्दा किनारा लाग्न कति वर्षौं लाग्छ सबैलाई थाहा छ,’ उनले भने, ‘यो सरकारले विपक्षी पार्टीको मात्रै होइन, आफ्नै पार्टीभित्र पनि प्रतिस्पर्धी छ भने त्यसलाई पनि यो हतियार प्रयोग गर्नसक्ने भयो। त्यसैले मैले यहीबाट समाधान गर्नुपर्छ, राजनीतिक दलहरूसँग कुरा गरियोस् भनेको छु।’ यद्यपि, सभामुखले तत्काल लामिछानेको सांसद पद फुकुवा गर्न नसक्ने जवाफ दिएका थिए।
रास्वपा सभापति रवि लामिछाने सहकारी ठगीसम्बन्धी पर्साको मुद्दा विलम्ब गरिएको भन्दै असन्तुष्ट जनाएका छन्। पर्साको मुद्दा सरकारले हतियार बनाएर राखेको उनले बताए। सरकारले छोप्यौँ भन्ने ठानेको भएता पनि नांगै देखिएको उनको भनाइ थियो।
‘सरकारले हतियार बनाएर राखेर पर्साको (मुद्दा) चाहिँ झुण्ड्याइराख्या छ। मान्छे लगाएर हालिएको मुद्दा हामीलाई थाहा छैन र ? हकदैया छैन, हदम्याद छैन। सबै थाहा छ। सब जगजाहेर छ,’ उनले भने, ‘सरकार छोप्यौँ भन्ठान्छ हामी नांगो देखिराख्या छौं। सरकार छोपिएको छ, छोपिएको छ भनिरहेको छ तीनकुनेको छोप्याजस्तो । तर, नांगो भइसक्यो।’
लामिछानेविरुद्ध पर्सा जिल्लामा सहकारी संस्थाको रकम अपचलन गरेको आरोपमा मुद्दा छ। यससम्बन्धी अनुसन्धान लम्ब्याइएको आरोप लब्याएर दुःख दिइरहने हतियार बनाउन खोजेको लामिछानेको भनाइ थियो। कास्की, काठमाडौं, रूपन्देही र चितवन गरी चारवटा जिल्लामा सहकारीसम्बन्धी मुद्दा दर्ता भएर पनि लामिछाने चारैतिर धरौटीमा रिहा भएका हुन्। तर, वीरगञ्जस्थित सानो पाइला बचत तथा ऋण सहकारी संस्थाको रकम अपचलनसम्बन्धी मुद्दा भने अगाडि बढ्न सकेको छैन। यो विषयमा जिल्ला अदालत पर्सामा दुईपटक मुद्दा दर्ता भइसकेको छ। तर, अगाडि बढेको छैन।
रास्वपाले राष्ट्र निर्माणसम्बन्धी खाका तयार गर्न उपसभापतिद्वय डोलप्रसाद अर्याल (डिपी) र स्वर्णिम वाग्लेको संयोजकत्वमा कार्यदल बनाएको छ। सभापति लामिछाने कार्यकारी भूमिका फर्किएपछि बसेको केन्द्रीय समिति बैठकले सुमना श्रेष्ठ, शिशिर खनाल, विराजभक्त श्रेष्ठ र डा. तोसिमा कार्की सदस्य रहेको कार्यदल गठन गरेको कार्यवाहक प्रवक्ता मनीष झाले जानकारी दिए।
कार्यदलले पार्टीको तर्फबाट राष्ट्रनिर्माणसम्बन्धी खाका तयार गर्ने उनले बताए। त्यस्तै, बैठकले लिडरसिप एकेडेमी र उम्मेदवार क्लबको कार्यान्वयनका लागि सहमहामन्त्रीद्वय सुमना श्रेष्ठ र विपिनकुमार आचार्यलाई जिम्मेवारी तोकिएको उनले जानकारी दिए।
चैत २३ गतेदेखि रास्वपाले चितवनबाट जनयात्रा सुरु गर्दै छ। प्रथम परिषद्को राष्ट्रिय भेलामा घोषणा गरेअनुरूप जनताको कुरा सुन्ने यात्रा, जनयात्राको सुरु गर्न लागिएको मनीष झाले बताए।
हिमालय टाइम्स दैनिकबाट
