वीरगञ्ज : चित्लाङ–थानकोट सडक (गणेश मान सिंह मार्ग) निर्माणमा ठेकेदार कम्पनीले निरन्तर लापरबाही गरेको भन्दै स्थानीयले आइतबार बिरोध गरेका छन् । त्यसै थन्किएर बसेको जेसीबीमा स्थानीयहरुले बिभिन्न माग लेखिएको प्लेकार्ड टाँसेर चित्लाङबासीले आइतबार निर्माणधिन सडकमै पुगेर विरोध जनाएका हुन् ।
सडक निर्माणमा भइरहेको ढिलासुस्तीको कारण सार्वजनिक गरियोस्, थाहानगरबासीले भोगिरहेको दुःखलाई सामान्य रुपमा नलिइयोस्, सडक निर्माण नगर्ने हो भने बाटोको ट्र्याक खोलेर बाटो सुचारु गरियोस् लगायतको माग रहेको प्लेकार्ड उनीहरुले थन्किएका जेसीबीमा टाँसेर विरोध जनाएका हुन् ।
स्थानीयको मागलाई तत्काल सम्बोधन नगरिए कडा संघर्ष गर्ने चेतावनी समेत दिएका छन् । सडक बनाउनुको साटो उल्टै निर्माण कम्पनीले देउराली डाँडादेखि राम्चेसम्मको सडकखण्ड भत्काएर अलपत्र छोडेको स्थानीय शिक्षक राजेन्द्र बलामीले गुनासो गरे ।
शनिबार मदन भण्डारी विज्ञान तथा प्रविधि विश्वविद्यालय निर्माण स्थलको निरीक्षणका क्रममा पुगेका थाहा नगरपालिका प्रमुख लवशेर विष्टलाई समेत स्थानीयले सडक निर्माणमा ठेकेदार पक्षबाट भइरहेको लापरबाहीका बारेमा ध्यानाकर्षण गराएका थिए । गत जेठदेखि नै सडक निर्माणका लागि थाहानगरबासीले दवाव दिँदै आइरहेका छन् ।
