रौतहट : रौतहटमा चन्दा नदिएको भन्दै एक समूहले राजपुर नगरपालिका वडा नम्बर ७ स्थित चौधरी इटाभट्टामा बम राखेको छ । शनिबार बिहान भूमिगत समूह मधेस नेशनल पार्टीले इटाभट्टामा प्रेसर कुकर बम राखेको हो ।
त्यहाँ कार्यरत मजदूरले झोलाभित्र बम देखेपछि प्रहरीलाई खबर गरेपछि सेनाको बम डिस्पोजल टोलीले डिस्पोज गरेको जनाइएको छ । इलाका प्रहरी कार्यालय राजपुरले दुई महिनाअघि इटा भट्टाका मालिक विनोद प्रसाद जयसवालसँग भूमिगत समूहले चन्दा मागेको थियो । तर जयशवालले चन्दा नदिएपछि सो समूहले धम्की दिँदै आएको थियो । उक्त घटनाको अनुसन्धान भइरहेको प्रहरीले जनाएको छ ।
