जनकपुरधाम : भारत विहार राज्यको दरभंगाबाट सामाजिक अभियन्ता सरोज रायले ५ नेपाली बालकको उद्धार गरेका छन् । बाराका २, सर्लाहीका २ र महोत्तरीका एक बालकलाई अभियन्ता रायले शनिबार बिहान उद्धार गरी जनकपुरधाम ल्याएका छन्।
बाराको कलैया नगरपालिकाका सुमीत दास, गंजभवानीपुरका इन्ताज हबारी, सर्लाही चक्रघट्टा गाउपालिकाका दिपेश यादब, सोही ठाउँका कृष्ण महतो र महोत्तरी सम्सी गाउँपालिकाका शेख नेमतुल्लाहलाई उद्धार गरिएको छ।
उद्धार गरिएका सबै बालक १४ वर्षमुनिका रहेका छन्। कानुनी प्रक्रिया पूरा गर्न नै एक महिनाभन्दा बढी लागेको र बल्ल आज उद्धार गरेर पाँचै बालकलाई ल्याउन सफल भएको अभियन्ता रायले बताए। यसअघि पनि अभियन्ता रायले दर्जनौं बालबालिकाको भारतबाट उद्धार गरेका छन्। उनले विगत ६ महिनामै करिब ३ दर्जन बालिबालिकाको उद्धार गरेर परिवारको जिम्मा लगाएको उनले बताए।
